د رویټرز د راپور له مخې، د امریکا په ټکزاس کې د سېلابونو او توپانونو له امله ۱۳۱ کسان مړه او ۹۷ نور لادرکه دي.
ځايي چارواکو پرون دوشنبه له سختو سېلابونو لس ورځې وروسته یو ځل بیا د زیاتو بارانونو او توپانونو خبرداری ورکړی دی.
سربېره پر دې د ټکزاس په ځینو سیمو کې د سېلابونو د ګواښ له امله د پلټنو عملیات هم درول شوي دي.
د ټکزاس والي ګریګ ایبټ پرون دوشنبه ویلي، چې د جولای له ۴مې راهیسې د توپانونو له امله ۱۳۱ کسان مړه شوي او ۹۷ نور لا هم ورک دي.
د راپورونو له مخې، تر ټولو ډېر ځاني تلفات په کر کاونټي سیمه کې اوښتي، چې ډېری یې ماشومان دي.