د بهرنیو چارو له سرپرست وزیر محترم مولوي امیرخان متقي سره د افغانستان لپاره د مالېزیا د بهرنیو چارو وزارت ځانګړي استازي ښاغلي احمد اعظم عبدالرحمن لیدنه کړې.
په دې لیدنه کې د مالېزیا ځانګړي استازي د افغانستان د امنیتي وضعیت په اړه خوښي څرګنده کړې او ویلي یې دي، چې د مالېزیا د بهرنیو چارو وزیر له ځانګړي پيغام سره افغانستان ته راغلی یم او هیله لرم، چې د دې پیغام پر مټ به د دواړو هېوادونو اړيکې د پخوا په پرتله لا پراختیا ومومي.
نوموړي زیاته کړې، چې له کابل څخه به هم د اړیکو او همکاریو د پراختیا پیغام له ځان سره وړم.
مولوي امیرخان متقي ښاغلي احمد اعظم عبدالرحمن ته د دې نوې دندې د مبارکي تر څنګ هیله څرګنده کړې، چې شخصاً تاسو به د دې اړیکو په پراختیا کې رغنده رول ولوبوئ.
نوموړي زیاته کړې، چې ستاسې د بهرنیو چارو د وزیر پیغام مونږ ته ډېر د اهمیت وړ دی او باور لرم. چې د دواړو هېوادونو د اړیکو په لا پياوړتیا کې به ګټور ثابت شي.
ښاغلي متقي ویلي، چې د دواړو هېوادونو د سوداګرو تګ راتګ او افغانستان کې پانګونې ته ښه فرصتونه شته چې باید ورڅخه ګټوره استفاده وشي.
په پای کې دواړو لوریو د اړیکو په پراختیا او د همکاریو په پیاوړتیا ټينګار کړی دی.