د بنګلهدیش دولت د مخالفینو په لاریونونو کې پرون (یکشنبه، د زمري ۱۴مه) د ۱۴ پولیسو په شمول لږ تر لږه ۹۵ کسان وژل شوي.
یاد لاریونوال د د دې هېواد د لومړۍ وزیرې شیخ حسینه د ګوښه کېدو غوښتنه کوي.
د بنګلهدیش په بېلابېلو سیمو کې پولیسو د لاریونونو د خپرولو په موخه له اوښکې بهوونکي ګاز او پلاستیکي مرمیو ګټه اخیستې او حکومت په ټول هېواد کې تر نامعلومې مودې ګرځبندیز اعلان کړی دی.
دا لاریونونه چې د محصلینو له لوري رهبري کېږي “د مدني نافرمانۍ د پراخ کمپاین” اعلان یې کړی او ویلي یې دي، چې د مالیې او اوبو او برېښنا د بیلونو په نه ورکولو سربېره به له حکومت سره په هره برخه کې مخالفت وکړي.
د راپورونو پر اساس د بنګلهدیش په پلازمېنه ډاکه کې د ګرځنده ټلیفون انټرنیټ ته لاسرسی بند شوی.
بنګلهدیش کې د وروستۍ یوې میاشتې لاریونونو له امله څه باندې ۲۷۰ کسان وژل شوي.
رسنۍ وايي، چې د شیخ حسینې د حزب ‘عوامي لیګ’ پلویان هم د نوموړې په ملاتړ سړکونو ته راوتلي او له لاریونوالو سره یې نښتې کړې دي.
دا لاریونونه په پیل کې د دندو د ونډې پر ضد وو، خو سره له دې چې د بنګلهدیش سترې محکمې د دې ونډو ۹۰ سلنه لغوه کړې، بیا هم لاریونونه نه دي درېدلي او لمن یې لا پسې پراخه شوې ده.