اسراییلو تېره شپه غزه کې په ‘الاهلي عرب’ روغتون هوايي برید کړی، چې په پایله کې یې سلګونه کسان شهیدان او ټپيان شوي.
د فلسطین عامې روغتیا وزارت ویلي، چې په دې هوايي برید کې څه باندې ۵۰۰ کسان شهیدان شوي او سلګونه نور ټپيان دي.
د یاد وزارت په وینا؛ په وژل شوو او ټپیانو کې ډېری ښځې او ماشومان دي.
د اسراییلو دا برید د نړیوالو توند غبرګونونه پارولي او په کلکو ټکو یې غندلی دی.
د فلسطین دولت مشر محمود عباس د صهیونیستي اسراییلو له لوري په ‘الاهلي عرب’ روغتون د برید له امله، چې څه باندې ۵۰۰ کسان پکې شهیدان شوي، درې ورځنی ملي ماتم اعلان کړ.