د «سانا» خبري اژانس د راپور پر اساس، سوریې له نړیوال بانک سره د برېښنا شبکې بیارغونې په موخه وروستی سند لاسلیک کړ، چې دا په تېرو ۴۰ کلونو کې په یاد هېواد کې د نړیوال بانک لومړۍ پروژه ده.
د سوریې د مالیې وزیر محمد یاسر بارنیه ویلي، چې د دې پروژې مالي لګښت د پور بڼه نه لري او د وړيا مرستو په چوکاټ کې ترسره کېږي.
نوموړي زیاته کړې، چې د نړیوال بانک په همکارۍ په بېلابېلو برخو کې نورې پروژې هم د چمتو کېدو په حال کې دي، چې د یاد بانک د بلاعوضه مرستو له لوري به یې مالي ملاتړ وشي.
د یادولو ده، چې د روان زیږدیز کال په جون میاشت کې د نړیوال بانک مدیره پلاوي سوریه کې د برېښنا شبکې ترمیم لپاره ۱۴۶ میلیونه ډالره مرسته تصویب کړې وه.