د کانونو او پټرولیم وزارت د پالیسۍ او پروګرامونو مرستیال شیخ عبدالرحمن قانت د قزاقستان د ترانسپورټ وزارت له سلاکار او د دغه هېواد د رېل پټلۍ شرکت له مرستیال سره لیدنه کړې.
په دې لیدنه کې دواړو لوریو پر بېلابېلو موضوعاتو، په ځانګړي ډول د دواړو هېوادونو ترمنځ د اړیکو د پیاوړتیا په اړه خبرې کړې دي.
شیخ عبدالرحمن قانت مېلمنو ته د ښه راغلاست ترڅنګ، د دوی شتون د اقتصادي اړیکو د پراختیا او پیاوړتیا لامل بللی او دغهراز د افغانستان د کاني سرچینو په اړه یې هم معلومات شریک کړي دي.
د قزاقستان د ترانسپورټ وزارت سلاکار د افغانستان د کانونو په برخه کې د پانګونې لېوالتیا څرګنده کړې او د وزارت د رهبرۍ له مېلمه پالنې یې مننه کړې ده.
دغه راز، د پالیسۍ او پروګرامونو مرستیال د دوی د پانګونې د لېوالتیا هرکلی کړی او د کان کیندنې د قانون او کړنلارې اړوند د همکارۍ ډاډ یې ورکړی دی.