د فرانسې ولسمشر ایمانوېل مکرون پرون (پنجشنبه، د زمري ۲مه) اعلان کړی، چې فرانسه، فلسطین د یوه خپلواک هېواد په توګه په رسمیت پېژني.
مکرون په ټولنیزو رسنیو کې ویلي، چې دا پرېکړه به د روان میلادي کال په سپټمبر میاشت کې د ملګرو ملتونو د عمومي اسمبلۍ په غونډه کې اعلان کړي.
نوموړي لیکلي: “اوسنۍ بېړنۍ اړتیا دا ده، چې د غزې جګړه پای ته ورسېږي او ملکي وګړي وژغورل شي.”
ایمانوېل مکرون زیاته کړې: “سوله شونې ده. موږ سملاسي اوربند، د بندیانو خلاصون او د غزې د خلکو لپاره پراخه بشري مرستو ته اړتیا لرو.”
د فرانسې د ولسمشر په وینا، په دې سره به فرانسه له جي اووه هېوادونو لومړنی هېواد وي، چې فلسطین د یوه خپلواک هېواد په توګه په رسمیت پېژني.
فلسطیني چارواکو د مکرون د دې پرېکړې هرکلی کړی دی.
جي۷ د صنعتي پرمختللو هېوادونو یوه ډله ده، چې د فرانسې تر څنګ امریکا، برېتانیا، اېټالیا، جرمني، کاناډا او جاپان پکې شامل دي.