برتانیا کې تېره ورځ عمومي ټاکنې پیل شوې، چې له لارې یې د دغه هېواد عمومي مجلس ته ۶۵۰ غړي ټاکل شوي وو.
هر هغه ګوند چې ډېرې څوکۍ لاسته راوړي، مشر به یې د برتانیا لومړی وزیر وټاکل شي.
بریتانیا ۶۵۰ ټاکنیزې حوزې لري او د دې ټولو حوزو هر رایې ورکوونکی باید د ځايي اوسېدونکو په استازیتوب یو کاندید دارالعوام یا استازو جرګې ته وټاکي.
د اعلان شویو رایو له مخې کارګر ګوند د پارلمان له ۶۵۰ څوکیو څخه څه باندې ۵۰۰ څوکۍ ګټلې دي.
دا تر ۱۴ کلن ځنډ وروسته لومړی ځل دی، چې یو بل ګوند په برتانیا کې واک ترلاسه کوي.
د برتانیا لومړي وزیر ریشي سوناک هم د خپل ګوند ماتې منلې او د کارګر ګوند د بریا مبارکي یې ورکړې ده.
په تېر ځل ټاکنو کې چې په ۲۰۱۹ کال شوې وې، د بوریس جانسن په مشرۍ محافظه کار ګوند ۳۶۵ څوکۍ ګټلې وې او کارګر ګوند کاندیدانو پر ۲۰۳ څوکیو بریا خپله کړې وه، چې دا په ټاکنو کې له ۱۹۳۵ وروسته د یاد ګوند تر ټولو ستره ماتې بلل شوې وه.